ڪن مبصرن جو خيال آهي ته صيهونيت جي تسليمي ۽ عثماني سلطنت جي ناڪاميءَ کانپوءِ دُنيا جي يهودين جي فلسطين ڏانهن ٿيل لڏپلاڻ سان ئي عربن ۽ اسرائيل جي وچ ۾ ڦڏو شروع ٿي ويو هُو. ڪن جو خيال آهي ته اِهو تڪرار، اسرائيل جي وجود ۾ اچڻ سان شروع ٿيو آهي. 1948ع ۾ عرب ملڪن ۽ اسرائيل جي وچ ۾ پهرين جنگ لڳي، جنهن ۾ عرب ملڪن کي وڏي شڪست آئي ۽ اسرائيل فلسطين سميت ڪيترن ئي علائقن تي قبضو ڪري ڇڏيو. عرب ملڪن، خاص ڪري مصر ۽ اسرائيل وچ ۾ ٻي جنگ سوئيز واهه تي قبضي تان 1956ع ۾، ٽين جنگ 1967ع ۾ ( جنهن جي نتيجي ۾ سينائي جي رڻ پٽ ، غَذا جي پٽيءَ ، بيت المُقدس ، بيت اللحم ۽ هيبرون وغيره جي عرب علائقن تي اسرائيل جو قبضو ٿي ويو ) ۽ چوٿين جنگ 1973ع ۾ لڳي . جڏهن ته 1982ع ۾ آزادي پسند فلسطيني گوريلن خلاف آپريشن ڪندي اسرائيلي فوجن جي طرفان بيروت تي ڪيل چڙهائيءَ کي به ڪُجهه مبصر مڪمل جنگ طور ڳڻين ٿا . مغربي ملڪن ۽ آمريڪي مدد هجڻ ڪري ، لڳ ڀڳ سڀني جنگين ۾ ، اسرائيل کي سوڀ حاصل ٿي ، جنهن عربن کي ڏاڍو دلگير ڪيو ۽ سندن فوجي اهليت بابت غيريقيني پيدا ڪئي . اڄڪلهه به اهو جهڳڙو جاري آهي ، پر هاڻي انهيءَ تڪرار ۾ فلسطيني پاڻ اهم ڪردار ادا ڪري رهيا آهن ، جڏهن ته ٻين عرب ملڪن جي دلچسپي گهٽجي ويئي آهي